Sekretari i Përgjithshëm i NATO-s Jens Stoltenberg mblodhi sot (22.11) liderët e Ballkanit Perëndimor në një samit në RMV.
Ballkani Perëndimor është strategjikisht i rëndësishëm për NATO-n edhe pse nuk ka kërcënim të drejtpërdrejtë ushtarak për asnjë nga vendet e rajonit, ka ende arsye për shqetësim për situatën për shkak të tensioneve në rritje, deklaroi sot në Shkup Sekretari i Përgjithshëm i Aleancës, Jens Stoltenberg, pas takimit me liderët e anëtarëve të Paktit nga rajoni.
“Ne shohim kërcënime të secesionizmit në BeH, një situatë të brishtë të sigurisë në Kosovë dhe një bllokim të negociatave midis Beogradit dhe Prishtinës, dhe shtetet autoritare si Rusia kërcënojnë integritetin tonë demokratik me kërcënime kibernetike”, theksoi Stoltenberg pas takimit ku morën pjesë kryeministri Dimitar Kovaçevski, kolegët e tij nga Shqipëria dhe Mali i Zi, Edi Rama dhe Milojko Spajiç dhe presidenti kroat Zoran Milanoviq.
Sipas Stoltenbergut, në NATO ka shqetësim për zhvillimin e ngjarjeve në vende të caktuara të Ballkanit Perëndimor dhe për këtë arsye duhet të njihet forca dhe rëndësia e Aleancës në rajon.
“Mezi pres të diskutoj sigurinë rajonale me liderët, por edhe zgjidhjen e disa sfidave me të cilat përballemi jashtë këtij rajoni. Ne po shohim gjithnjë e më shumë konkurrencë globale, konkurrencë nga fuqitë e mëdha. Lufta në Ukrainë është ndezur. Ka një luftë e re në Lindjen e Mesme. Unë mirëpres marrëveshjen midis Hamasit dhe Izraelit që duhet të çojë në lirimin e pengjeve dhe një ndërprerje të armiqësive dhe dërgimin e ndihmave humanitare. Pres me padurim takimin me të gjithë liderët dhe ju falënderoj shumë për angazhimin tuaj të fortë ndaj Aleancës sonë”, tha Stoltenberg.
“NATO-ja ka vite që është e pranishme në këtë rajon. Në Kosovë kemi shtuar praninë tonë me rreth 1000 ushtarë shtesë dhe me armatim më të rëndë. Ne jemi gjithmonë të kujdesshëm, duke monitoruar nga afër situatën dhe gjithmonë do të bëjmë atë që është e nevojshme për të mbrojtur të gjithë aleatët”, tha Stoltenberg.
Ai theksoi se për NATO-n janë të rëndësishme edhe mënyrat e bashkëpunimit me partnerët nga rajoni dhe për të stabilizuar fqinjësinë e Aleancës.
“Kur fqinjët tanë janë më të qëndrueshëm, ne jemi më të sigurt. Prandaj është e rëndësishme për mua që të ulem me të gjithë liderët nga ky rajon dhe të ndaj vlerësimet tona, sepse kështu do të mund të kuptojmë më mirë se si të ecim përpara”, theksoi Stoltenberg, duke shtuar se NATO-ja ka një histori të përbashkët me Ballkanin Perëndimor, por edhe detyrimin për të ndihmuar në sigurimin e paqes dhe prosperitetit të tij.
Stoltenberg theksoi se po u drejtohet të gjithëve në rajon me mesazhin se është e rëndësishme të zgjidhet dialogu dhe diplomacia në vend të konfliktit dhe luftës, duke theksuar se dialogu ndërmjet Beogradit dhe Prishtinës është thelbësor për paqen dhe prosperitetin e tyre, ndërsa propozimet e fundit për formimin e Bashkësisë së komunave me shumicë serbe, ai i konsideroi një hap përpara.
“Është koha për të kapërcyer konfliktet rajonale, të cilat kanë vazhduar për një kohë të gjatë”, tha Stoltenberg.
Në këtë kontekst, ai thekson se Republika e Maqedonisë së Veriut është një aleat i vlefshëm i NATO-s që jep një kontribut të rëndësishëm për sigurinë e përbashkët, por gjithashtu është shembull i marrëdhënieve të suksesshme ndëretnike dhe një shoqëri në të cilën njerëzit nga grupe të ndryshme etnike jetojnë së bashku dhe ndërtojnë vendin në bashkëjetesë paqësore.
Kreu i Aleancës shtoi se në takim është diskutuar edhe për agresionin rus ndaj Ukrainës dhe u ka bërë thirrje të dyja palëve që t’i japin fund konfliktit, duke përshëndetur kontributin e aleatëve të NATO-s në këtë drejtim, veçanërisht përballë situatës së vështirë në fushën e betejës.
Stoltenberg paralajmëroi bashkëpunim të ngushtë në të ardhmen, si dhe gjatë përgatitjeve për Samitin e ardhshëm të NATO-s në Uashington vitin e ardhshëm, në të cilin, siç theksoi ai, Aleanca do të vazhdojë të punojë për ndërtimin e një të ardhmeje të përbashkët dhe forcimin e sigurisë së saj ndaj konkurrencës gjeostrategjike dhe mbështetjes së Ukrainës.
Në konferencën për median që u mbajt pas takimit të liderëve të pesë vendeve anëtare të NATO-s nga Europa Juglindore me pjesëmarrjen e Sekretarit të Përgjithshëm të NATO-s, Jens Stoltenberg.Kryeministri Edi Rama theksoi domosdoshmërinë e ruajtjes së kufirit Kosovë- Serbi nga NATO pasi e konsideron burim i shumë të këqijave.
“NATO duhet të jetë më e pranishme në Kosovë dhe e angazhuar me më shumë trupa për të siguruar kufirin mes Serbisë e Kosovës që është burim i shumë të këqijave nga i cili penetrojnë individë, grupe e forca që synojnë të destabilizojnë Kosovën”
E vetmja rrugë për të zgjidhur problemet mes Kosovës e Serbisë është rruga e dialogut të ndërmjetësuar nga BE beson Rama, dhe propozon që formatin e ardhshëm të këtij takimi të zhvillohet me praninë e vendeve të tjera të Ballkanit Perëndimor që nuk janë anëtare të NATO-s por kanë marrëveshje partneriteti.
“Kjo është e rëndësishme. Nuk duhet harruar se paqja që kemi në këtë rajon është jashtëzakonisht e çmuar” nënvizon Rama
Më tej ai thekson se Kosova duhet të ndihmohet të përshpejtojë integrimin e saj në NATO.
“Është absurd që Kosova të pengohet në këtë proces” tha Rama.
Në konferencën për median në Shkup Kryeministri Edi Rama theksoi dhe nevojën që NATO të garantojë kufijtë mes Kosovës dhe Serbisë pasi faktikisht është jashtë kontrollit dhe në shërbim të trafikut të armëve, drogës.
“Theksova domosdoshmërinë e rritjes së numrit të forcave të NATO-s në Kosovë dhe domosdoshmërinë për të garantuar kufirin mes Kosovës e Serbisë që faktikisht është jashtë kontrollit dhe është në shërbim të trafikut të armëve, drogës, e aktiviteteve të cilat pastaj ngatërrohen me aktivitetin politik me sfond ultranacionalist që shkakton devijime të rënda si devijimi në Banjskë.
Rama tha më tej se sulmi i 24 shtatorit në veri të Kosovës nuk duhet të konsiderohet sporadik por paralajmërim.
Kryeministri Edi Rama kërkoi sot nga Shkupi, ku u mbajt takimi i liderëve të pesë vendeve anëtare të NATO-s nga Europa Juglindore që aplikimi i Shqipërisë për të bashkëfinancuar me NATO-n bazën e re detare të NATO-s në Porto Romano të procedohet sa më shpejt.
Në një konferencë e përbashkët për shtyp me Sekretarin e Përgjithshëm të NATO-s, Jens Stoltenberg, Kryeministrin e Republikës së Maqedonisë së Veriut, Dimitar Kovaçevski, me Presidentin e Republikës së Kroacisë, Zoran Milanović, Kryeministrin e Republikës së Malit të Zi, Millojko Spajiç, Rama u shpreh se, “ne besojmë shumë që çdo gjë që ndodh hap pas hapi e përforcon vlerën strategjike të një investimi të tillë, jo thjesht për Shqipërinë, as thjesht për krejt rajonin tonë, por edhe për vetë NATO-n, e cila do të fitojë një tjetër akses të shpejtë në këtë anë të Evropës për çdo rast dhe për qëllimet strategjike të mbrojtjes së përbashkët”.
Dëshiroj të theksoj edhe kërkesën që aplikimi i Shqipërisë për të bashkëfinancuar me NATO-n bazën e re detare të NATO-s në Porto Romano të procedohet sa më shpejt. Sepse besojmë se çdo gjë që ndodh hap pas hapi e përforcon vlerën e strategjike të një investimi të tillë jo thjesht për Shqipërinë, as për rajonin por për vetë NATO-n që do fitojë një tjetër akses të shpejtë në këtë anë të Europës për çdo rast të mbrojtjes së nevojshme.
Shqipëria ka përmbushur me buxhetin e vitit 2024, objektivin e financimit të Mbrojtjes me 2% siç është struar nga tryeza e NATO-s për të gjitha vendet anëtare. Do vazhdojmë të jemi të përkushtuar për rritjen e kapaciteteve dhe shtimin e efiçencës së forcave tona të armatosura.
Kreu i qeverisë gjithashtu nënvizoi se, “Shqipëria ka përmbushur me buxhetin e vitit 2024 edhe objektivin e financimit të mbrojtjes me 2%, siç është shtruar nga tryeza e NATO-s për të gjitha vendet anëtare dhe ne do të vazhdojmë të jemi shumë të angazhuar dhe shumë të përkushtuar për të forcuar kapacitetet tona për të rritur eficiencën e Forcave tona të Armatosura dhe njëkohësisht mbetemi në frontin e vendeve të NATO-s, një anëtar i përgjegjshëm dhe i palëkundur në të gjitha sfidat e përbashkëta”.
Rama propozon samit të NATO-s me Ballkanin Perëndimor
Kryeministri Edi Rama deklaroi sot nga Shkupi, ku u mbajt takimi i liderëve të pesë vendeve anëtare të NATO-s nga Europa Juglindore se, ka propozuar një format të një Samitit të NATO-s me Ballkanin Perëndimor.
Rama u shpreh se, “Sekretari i Përgjithshëm i NATO-s, mirëpriti me interes propozimin për të ndërtuar një format të një Samitit të NATO-s me Ballkanin Perëndimor, ku të jenë të pranishëm, jo vetëm vendet anëtare të NATO-s në këtë rajon, por edhe vendet partnere të NATO-s. Pra faktikisht vendet e tjera të Ballkanit Perëndimor, që këtu sot nuk janë të pranishme, si edhe pjesa tjetër e vendeve anëtare që janë në kufi me rajonin dhe që kanë një interes të drejtpërdrejtë për stabilitetin dhe progresin demokratik të rajonit”.
Nga ana tjetër, Rama theksoi se, “jam i keqardhur për faktin që pavarësisht thirrjeve të përsëritura për të shtuar në mënyrë të ndjeshme, jo vetëm vëmendjen, por edhe trupat, të cilat duhet të garantojnë stabilitet dhe paprekshmëri absolute të Kosovës, ka ndodhur një ngjarje tragjike, e cila duhet konsideruar një paralajmërim dhe jo një ngjarje sporadike dhe e cila duhet me çdo kusht të mos përsëritet më”.
Për këtë arsye u shpreh Rama, “theksova edhe sot në takim domosdoshmërinë e rritjes së numrit të forcave të NATO-s në Kosovë dhe domosdoshmërinë për të garantuar kufirin mes Kosovës dhe Serbisë, i cili faktikisht është jashtë kontrollit dhe i cili është në shërbim të aktiviteteve ilegale të trafikut të armëve, të trafikut të drogës, të aktiviteteve të cilat pastaj ngatërrohen, siç e dimë të gjithë, edhe me aktivitetin politik me sfond ultra-nacionalist, që shkakton devijime të rënda, siç ishte devijimi në Banjskë ku humbi jetën në krye të detyrës një punonjës i policisë së Republikës së Kosovës dhe ku qartësisht doli në pah rrezikshmëria e lartë për destabilizim dhe për përshkallëzim të një konflikti, që siç e tha Sekretari i Përgjithshëm ka vetëm një vend për t’u trajtuar në tryezën e dialogut të ndërmjetësuar nga BE me Kosovës dhe Serbisë”.
Presidenti i Kroacisë, Zoran Milanoviç, duke iu përgjigjur një pyetjeje të gazetarëve për dëbimin e një diplomati kroat nga Serbia tha se kjo duket të jetë pjesë e fushatës parazgjedhore në vendin fqinj. “Mirë që ka zgjedhje në Serbi”, komentoi ai.
Kryeministri maqedonas, Dimitar Kovaçevski tha se qëndrueshmëria dhe siguria që ofron NATO-ja për vendin e tij dhe rajonin sjell edhe mirëqenie ekonomike, investitorë evropianë dhe amerikanë dhe standarde më të mira për qytetarët.
“Maqedonia e Veriut dhe vendet e rajonit meritojnë të jenë pjesë e Bashkimit Evropian”, tha ai, ndërsa shtoi se vendi ka kapacitet për t’i bërë ballë ndikimit rus dhe synimeve keqdashëse, ndërsa vendin e tij e shikon si një faktor stabiliteti në rajonin e Ballkanit.
Kryeministri malazez Milojko Spajiç theksoi përkushtimin e fuqishëm të qeverisë së tij për plotësimin e synimeve strategjike që janë: anëtarësimi i plotë në BE, zbatimi i politikave të NATO-s dhe zgjerimi i bashkëpunimit rajonal.
Sipas tij, gjendja e sigurisë në rajon kërkon një vigjilencë të vazhdueshme të BE-së dhe NATO-s, ndërsa tha se vendi i tij “ka 0 probleme me fqinjët”.
/Argumentum.al
