Raportuesja për Shqipërinë në Parlamentin Europian, Isabel Santos deklaroi sot në Tiranë se është e keqardhur nga deklaratat e Greqisë për Fredi Belerin.
Në një konferencë për shtyp, Santos theksoi se “jam e keqardhur për këtë lloj deklarate nga Greqia. Aq sa di autoritetet gjyqësore po bëjnë punën e tyre është një çështje që lidhet me zgjedhjet”.
“Duke qenë se çështja nuk është mbyllur nga organet gjyqësore duhet të presim vendimin e gjykatës, pasi është në proces gjyqësor”, tha Santos.
Santos u shpreh se “nëse të gjitha vendet do të sanksionin apo të bënin të tilla deklarata kur një shtetas i tyre përballet me një proces gjyqësor bota do të ishte e tmerrshme”.
“Do dalim në përfundim pasi të flasë drejtësia. Po e ndjek çështjen, jam mjaft e vëmendshme ndaj saj. Po i ndjek informacionet, por ajo që mund të them është se po pres për vendimin”, tha Santos.
Fredi Beleri, kandidati i koalicionit “Bashkë Fitojmë” për zgjedhjet vendore të 2023 në Himarë, u arrestua më 12 maj, 2 ditë para se të mbaheshin votimet me akuzën për korrupsion zgjedhor. Ai u shpall fajtor ndërsa pritet vendimi i formës së prerë.
