Dhoma Amerikane e Tregtisë ka kërkuar përmes një deklarate për shtyp eliminimin e detyrimeve fiskale për të paktën tre muaj, dhe për bizneset në sektorin e turizmit gjashtë muaj si dhe krijimin e një fondi të emergjencës që do të mundesojë akses në kapital (me anë të kredive të buta si dhe granteve). Këto propozime bëhen në menyrë që bizneset të përballojnë efektin negativ të kësaj periudhe të shkaktuar nga pezullimi i aktiviteteve ekonomike për të frenuar përhapjen e koronavirusit..
Në deklaratë Dhoma thotë se është duke ndjekur me shqetësim të madh sfidat e shkaktuara nga pandemia globale e COVID – 19 dhe ofron mbështetjen e saj për të parandaluar, mbajtur nën kontroll dhe zbutur pasojat e kësaj epidemie.
“Këto nuk janë kohë të zakonshme për biznesin. Politikat qeveritare duhet të orientohen në perputhje me situatat e jashtëzakonshme në të cilat po jetojmë. Në besojmë se rekomandimet tona do t’i vijnë në ndihmë të gjitha bizneseve të cilat janë dëmtuar financiarisht duke i lehtësuar nga detyrimet financiare të detyrueshme në kohë normale. Ne rekomandojmë plan masash si në vijim:
Kërkesë për shtyrjen e afatit ligjor për:
- Depozitimin e pasqyrave financiare
- Formularit për Deklarimin dhe Pagesën e tatimit mbi fitimin, si dhe;
- Njoftimit vjetor për transaksionet e kontrolluara
- Eliminimin e detyrimeve fiskale për të paktën tre muaj, dhe për bizneset në sektorin e turizmit gjashtë muaj
- Krijimin e një fondi të emergjencës që do të mundesojë akses në kapital (me anë të kredive të buta si dhe granteve) në menyrë që bizneset të përballojnë efektin negativ të kësaj periudhe”.
