Presidenti rus Vladimir Putin urdhëroi ushtrinë që të vendoste forcat e parandalimit bërthamor në një “gjendje të lartë gatishmërie” dhe përmendi “deklaratat agresive të vendeve të NATO-s” si arsye. Kjo, nga ana tjetër, nuk do të thotë se armët bërthamore do të përdoren në të vërtetë.
Teoria e parandalimit në luftë, meqë ra fjala, thotë se një forcë, nën kërcënimin e një arme të tillë që mund ta shkatërronte papritmas plotësisht (për shembull, bombat bërthamore), do të hiqte dorë nga qëllimi i saj origjinal – ndërhyrja ushtarake, d.m.th. të pengohen nga ndërmarrja e veprimeve. Kjo është pikërisht ajo që ndodhi gjatë Luftës së Ftohtë dhe besohet se kërcënimi i një sulmi bërthamor ishte ai që i pengoi Shtetet e Bashkuara dhe Bashkimin Sovjetik të fillonin një luftë të re.
Udhëheqësi rus “midis rreshtave” ka përmendur tashmë gatishmërinë e mundshme për të përdorur armë bërthamore kur filloi pushtimin e Ukrainës. Javën e kaluar, ai paralajmëroi se “kushdo që përpiqet të pengojë Rusinë” do të vuajë pasoja “të tilla që nuk janë parë kurrë në histori”. Këto fjalë janë interpretuar gjerësisht si një kërcënim për përdorimin e armëve bërthamore nëse Perëndimi qëndron në rrugën e Rusisë.
Kalimi në modalitetin e alarmit të lartë është një mënyrë që Moska të dërgojë një paralajmërim dhe ndoshta do të lehtësonte lëshimin e armëve bërthamore, por kjo nuk do të thotë se ato do të përdoren, shkruan BBC. Rusia ka stokun më të madh të armëve bërthamore në botë, por gjithashtu e di se NATO ka mjaftueshëm për të shkatërruar Rusinë nëse vendos të bëjë një lëvizje të tillë.
Qëllimi i urdhrit të Putinit është ndoshta të shkëpusë vendet e NATO-s që të mbështesin Ukrainën, duke qenë vazhdimisht i pasigurt se sa larg është gati të shkojë, si dhe çfarë saktësisht do të konsiderojë “një pikë në kovë” kur bëhet fjalë për mbështetjen e Ukrainës.
Shtetet e Bashkuara dënuan masën e presidentit rus, duke thënë se ishte një “përshkallëzim i panevojshëm”.
“Kjo do të thotë se presidenti Putin vazhdon të përshkallëzojë luftën në një mënyrë që është krejtësisht e papranueshme dhe ne duhet të vazhdojmë t’i frenojmë lëvizjet e tij sa më shumë që të jetë e mundur”, tha ambasadorja e SHBA në OKB Linda Thomas-Greenfield për CBS.
Po ashtu, Sekretari i Përgjithshëm i NATO-s, Jens Stoltenberg, theksoi se vendimi i Putinit tregon “seriozitetin e situatës” dhe se është “retorikë e rrezikshme”.
Rusia ka instaluar tashmë sisteme kundërajrore dhe pajisje të tjera të avancuara në Rusi, si dhe një flotë në Detin e Zi, në mënyrë që të parandalojë një ndërhyrje të mundshme ushtarake nga Perëndimi në Ukrainë, raportoi britanikja Guardian.
