Ambasadorja Zyrtare Gjermane e Futbollit, Steffi Jones– Gjermania, vendi mikpritës, është e gëzuar për pjesëmarrjen e Shqipërisë në Kampionatin Evropian të Futbollit në Gjermani
Steffi Jones, tre herë kampione e Evropës në vitet 1997, 2001, 2005 si dhe kampione bote në vitin 2003 dhe më pas trajnere e ekipit kombëtar, është një nga futbollistet më të njohura të Gjermanisë. Ajo u emërua “Ambasadore Zyrtare e Futbollit” nga Ministrja e Jashtme Federale Baerbok dhe në këtë cilësi do të vizitojë Tiranën ditën e hënë (22 prill) dhe të martë (23 prill).
Gjatë vizitës së saj ajo do të takohet me përfaqësuese dhe përfaqësues të futbollit shqiptar në të gjitha nivelet, me profesionistë por dhe me amatorë dhe fëmijë. Në fokus janë temat gjithëpërfshirje dhe diversitet.
Kampionati Evropian i Futbollit do të zhvillohet këtë vit në Gjermani, nga data 14.06. deri më 14.07, nën moton: “Loja në fushën e vetë për Evropën”. Kampionati do të jetë një festë e madhe e futbollit, një festë për të gjithë Evropën. Si zemra e Evropës, ne jemi të përkushtuar për kohezion në Evropë. Kësisoj, rregullat e qarta, respekti, larmia dhe ndershmëria janë shumë të rëndësishme si në sport, ashtu edhe në politikë.
Gjermania është veçanërisht e lumtur që Shqipëria do të marrë pjesë këtë vit në kampionat dhe do të mund të festojë bashkë me të gjithë popullin në Gjermani dhe në Evropë.
51 ndeshjet e EURO 2024 do të luhen në gjithsej dhjetë stadiume (Berlin, Hamburg, Leipzig, Köln, Dortmund, Gelsenkirchen, Düsseldorf, Stuttgart, Frankfurt dhe München). Për herë të parë që prej vitit 1988, 24 ekipet pjesëmarrëse do të ndeshen përsëri në Gjermani. Ndeshja e parë Gjermani-Skoci, e cila hap kampionatin, do të zhvillohet në datën 14 qershor në München. Finalja do të zhvillohet më 14 korrik në Berlin.
Me kampionatin EURO 2024 ne jemi gjithashtu veçanërisht të angazhuar për qendrueshmërinë: nuk u ndërtuan stadiume të reja, emetimet e dioksidit të karbonit do të kompensohen dhe biletat e trenave për tifozët që do të udhëtojnë do të ofrohen me çmim të reduktuar.
/Argumentum.al
