Kryetari i Partisë Demokratike Lulzim Basha zhvilloi takim me strukturat drejtuese të qarkut Tiranë për përgatitjen e Kuvendit Kombëtar të 2 shtatorit, me qëllimin, siç u shpreh ai, për ta bërë Partinë Demokratike një forcë moderne dhe bashkëkohore, gati në gjithë potencialin e saj, për t’u përballur me qeverisjen më të korruptuar të Europës.
Në një postim në rrjetet sociale, Basha theksoi se “afera e inceneratorëve dhe gjithë aferat e tjera për të cilat ministra, kryetarë bashkie e deputetë janë arrestuar për korrupsion, apo janë larguar nga politika për lidhjet me krimin, janë dëshmi se shteti i Edi Ramës është nën kthetrat e të korruptuarve”.
Ndaj, sipas tij, është i domosdoshëm miratimi i një pakete ligjore kundër krimit dhe korrupsionit qeveritar, duke i hequr çdo pengesë dhe dhënë mbështetje të pakushtëzuar SPAK, si për dënimin e korrupsionit edhe për sekuestrimin e pasurive që vijnë nga këto afera.
Basha tha se duhet nisur menjëherë me: Hetimin e mashtrimeve me kontratat dhe fondet publike; Hetimin pa asnjë përjashtim të kontratave koncesionare; Hetimin e pasurive të çdokujt që është marrë me hartimin, miratimin dhe përfitimin e kontratave koncesionare, duke përfshirë edhe kryeministrin; Hetimin dhe kapjen e parave që u janë vjedhur shqiptarëve dhe kanë përfunduar në llogari bankare, apo janë investuar kudo nëpër botë.
“Në bashkëpunim të ngushtë me qytetarët dhe partnerët tanë ndërkombëtarë, Partia Demokratike do punojë që ndryshimi i vërtetë që pret çdo shqiptar të bëhet realitet”, tha Basha.