Gjatë një vizite të papritur në Kiev të mërkurën, presidenti i Këshillit Evropian Charles Michel u zotua se BE do të bëjë gjithçka që mundet për të siguruar që Ukraina të mund të fitojë luftën kundër Rusisë. Njoftimi erdhi ndërsa forcat ruse, të mbështetura nga breshëri artilerie dhe raketash, tentojnë të avancojnë në dy provincat lindore të Ukrainës.
Presidenti i Këshillit Evropian Charles Michel ka thënë se BE-ja do të bëjë “çdo gjë të mundshme” për të ndihmuar Ukrainën të fitojë luftën.
Duke folur në një konferencë të përbashkët për shtyp me presidentin ukrainas Volodymyr Zelensky në Kiev, Michel u tha ukrainasve: “Ju nuk jeni vetëm. Ne jemi me ju. Dhe do të bëjmë gjithçka që është e mundur për t’ju mbështetur dhe për t’u siguruar që Ukraina do ta fitojë luftën. ” l
Udhëtimi i Michel pasoi vizitat këtë muaj në Kiev nga presidentja e Komisionit Evropian Ursula von der Leyen, shefi i politikës së jashtme të Bashkimit Evropian Josep Borrell dhe presidentja e Parlamentit Evropian Roberta Metsola.
“Ne diskutuam sanksionet kundër Rusisë, mbrojtjen dhe mbështetjen financiare për shtetin tonë dhe përgjigjet e pyetësorit për pajtueshmërinë me kriteret e BE-së”, shkroi Zelensky në Twitter.
Ai i referohej një pyetësori që iu dorëzua nga von der Leyen gjatë vizitës së saj në kryeqytetin ukrainas dhe konsiderohet si një pikënisje për Ukrainën në përpjekjet e saj për anëtarësim në BE.
“Faleminderit për një takim kuptimplotë dhe solidaritet me popullin (të Ukrainës)”, tha Zelensky.
/Argumentum.al
