Edhe në Kosovë me veprimtari të shumta kulturore e artistike po kremtohet 109 vjetori i pavarësisë së Shqipërisë, ku 28 nëntori tradicionalisht është kremtuar si ditë e flamurit kombëtar shqiptar.
Udhëheqësit politik të Kosovës në përgëzimet e tyre vlerësojnë se festa e flamurit është një prej vlerave më të mëdha të kombit shqiptar dhe ajo është e përjetësuar për të gjitha gjeneratat e ardhshme.
28 nëntorin shqiptarët e Kosovës e kremtojnë edhe si ditën e daljes së parë publike të ish Ushtrisë Çlirimtare të Kosovës në vitin 1997 dhe ditëlindjen e komandantit të saj legjendar Adem Jashari.
28 nëntori nuk është përfshirë në festat shtetërore të Kosovës, por është radhit në mesin e festave përkujtimore si festë e shqiptarëve. Të hënën në Kosovë është ditë pushimi e shpallur me vendim të posaçëm të qeverisë së vendit.
