Shtëpia e Bardhë falënderon presidentin Thaçi për dekorimin e Donald Trump

Këshilltari për Siguri Kombëtare i Presidentit të Shteteve të Bashkuara të Amerikës, Robert O’Brien, e ka falënderuar presidentin e Kosovës, Hashim Thaçi, për dekorimin e Presidentit të Shteteve të Bashkuara të Amerikës, Donald Trump, me Medaljen e Urdhrit të Lirisë si mirënjohje “për përkushtimin e thellë për banorët e Kosovës”.

O’Brien falënderon edhe për dekorimin e të dërguarit special në dialogun Kosovë-Serbi, Richard Grenell, si dhe vet atë me Medaljen e Meritave.

“Presidenti Trump është përkrahës i vendosur i Kosovës dhe beson fuqishëm se masat historike për normalizim ekonomik të arritura në Shtëpinë e Bardhë më 4 shtator 2020 do të ndihmojnë paqen dhe stabilitetin e qëndrueshëm në Ballkan Është nder i madh që të qëndroj përkrah banorëve të Kosovës. E çmojmë përkrahjen e fuqishme për zbatimin e normalizimit ekonomik me Serbinë”, thuhet në letrën që këshilltari O’Brien.

Theksojmë se, presidenti Hashim Thaçi, ka dekoruar presidentin e Shteteve të Bashkuara të Amerikës, Donald Trump, me Urdhrin e Lirisë, dekoratën më të lartë në Kosovë, për angazhimin e tij për të arritur një marrëveshje të paqes në mes të Kosovës dhe Serbisë, ndërsa ambasadorin Grenell dhe këshilltarin O’Brien i ka dekoruar me Medaljen e Meritave për rolin e tyre në arritjen e marrëveshjes për normalizim të marrëdhënieve ekonomike në mes dy vendeve.

“I pari i shtetit, në letrën drejtuar presidentit Trump, ka deklaruar se marrëveshja për normalizimin ekonomik në mes të Kosovës dhe Serbisë nuk do të ishte e mundur pa udhëheqjen e fuqishme të tij dhe të Shteteve të Bashkuara të Amerikës”, thuhej në njoftimin e Presidencës.