Presidenti Ilir Meta dekoron At Gjergj Fishtën me medaljen më të lartë të shtetit shqiptar, “Dekoratën e Flamurit Kombëtar”

Presidenti Ilir Meta ka dekoruar sot Gjergj Fishtën me medaljen më të lartë të shtetit shqiptar, “Dekoratën e Flamurit Kombëtar”.
Me rastin e 80-Vjetorit të ndarjes nga jeta, në vlerësim të veprës atdhetare dhe të rolit të jashtëzakonshëm në fushat e gjuhës dhe të letërsisë shqipe, arsimit e kulturës, diplomacisë, politikës e teologjisë, si dhe për meritat e Tij historike në krijimin e alfabetit shqip dhe në proceset shtetformuese, kam sot nderin e veçantë të çmoj me Dekoratën më të lartë në Republikën e Shqipërisë, At Gjergj Fishtën, atdhetarin, historianin, gjuhëtarin e madh, diplomatin dhe iluministin e shquar, për të cilin interesat kombëtare ishin po aq të shenjta, sa vetë besimi që i përkiste”,- shprehet kreu i shtetit në një mesazh të publikuar në Facebook.
Presidenti vlerëson figurën e Fishtës si intelektual dhe poet që me veprën e tij lartësoi vlerat e vendit.
Nëpërmjet veprave të Tij të çmuara artistike, ai ngriti lart, shpalosi botërisht dhe skaliti në përjetësi vlerat dhe virtytet e veçanta autoktone, si dhe përpjekjet e parreshtura të kombit shqiptar për liri, mbrojtje të trojeve shqiptare dhe të sovranitetit të vendit. Vepra e Tij e vyer do ta ndriçojë përherë kombin tonë për të tejkaluar çdo sprovë në mbrojtje të Pavarësisë, Lirisë, Demokracisë dhe së ardhmen europiane”,– deklaron kreu i shtetit.