U vra nga policia/ Të rinjtë e FRPD-së protestojnë për vdekjen e Klodian Rashës

Të rinj të Forumit të Partisë Demokratike protestuan paraditen e sotme para Ministrisë së Brendshme duke kërkuar drejtësi për 25 vjeçarin Klodian Rasha. Ata marshuan për disa minuta ndërsa kërkuan edhe largimin e Ministrit Sandër Lleshaj nga detyra dhe lëshuan akuza edhe ndaj politikave të Kryeministrit Edi Rama.

Ky reagim i të rinjve të FRPD erdhi pas marshit që zhvilluan mbrëmë të rinj dhe qytetarë në Shkodër. Ata dolën mbrëmë pas orës 22:00 në shenjë proteste, pas vrasjes së Rashës nga policia. Ata ndezën qirinj dhe marshuan në rrugët e kryeqendrës së veriut. Ata nuk hezituan të dilnin pavarësisht kushteve të motit dhe reshjeve.

Kreu i FRPD-së, Belind Këlliçi nga marshimi me të rinjtë e FRPD-së për vrasjen e të riut Klodjan Rasha, ka hedhur akuza ndaj Policisë së Shtetit për fshehje të provave dhe njollosje të figurës të së riut, sipas tij për të mbuluar efektivin. Këlliçi i ka kërkuar ministrit të Brendshëm, Sandër Lleshaj që të japë dorëheqjen për këtë ngjarje. Nga ana tjetër ka “shigjetuar” edhe kryeministrin Edi Rama, për heshtjen e tij ndaj kësaj ngjarje.

“Kjo që ka ndodhur dje është kriminale, është momenti që çdo qytetar të bëhet bashkë për të reaguar. Shqipëria shqiptare dhe kryeministri reaguan kur u vra ne Amerikë, po këtu çfarë bënë. Është e turpshme fshehja e provave të ngjarjes dhe baltosja e figures së tij.

Ai ka qenë duke ecur me hurma në duar. A kanë fëmijë a s’kanë fëmijë, ministri i Brendshëm ka fëmijë, ti vjen turp e mban veten edhe si malësor.

Nëse ke dinjitet dil dhe jep dorëheqjen. Nuk duam të bëjmë aspak, e dimë që do thoni se po bëjmë politike, aspak jo ne po bëjmë detyrën tonë si qytetarë dhe duke ftuar çdo të rinj dhe qytetarë të ngrenë zërin. E nisin duke ngacmuar seksualisht vajzat, duke rrahur të riun tek liqeni e tani duke vrarë. Të ngrihemi sa nuk është vonë. Kjo e keqe duhet të largohet e të marrë fund. Turp ti vijë atij turistit në Manhatan që ende nuk ka një reagim”, ka thënë ai.

Ndërkohë një protestë qytetare është paralajmëruar për t’u mbajtur pasdite në Tiranë, ndërsa në mbrëmje pas orës 22:00 do të mbahet një tjetër marshim pas hyrjes në fuqi të orës policore.