Bullgarët zgjedhin parlamentin e ri

Bullgarët po votojnë në zgjedhjet e parakohshme të dielën, pasi zgjedhjet që u mbajtën në muajin prill prodhuan një parlament të copëzuar, që nuk arriti të formojë një qeveri të qëndrueshme.

Anketat e fundit të cituara nga agjensia e lajmeve Reuters sugjerojnë se rezultati mund të jetë shumë i afërt. Anketimet e zhvilluara nga Gallup International dhe Alpha Research treguan një avantazh të lehtë për partinë GERB të ish kryeministrit, Boyko Borissov, megjithëse qeveria aktuale e përkohshme pati bërë akuza publike për korrupsion në shkallë të gjerë gjatë qeverisjes së tij.

Bullgaria, anëtare e NATO-s dhe BE-së, është kritikuar në mënyrë të përsëritur për mostrajtimin e korrupsionit dhe për mangësi në sundimin e ligjit dhe lirinë e medias.

Fushata anti-korrupsion e kundërshtarëve të ish kryeministrit Borissov, mori krahë gjithashtu nga sanksionet që Shtetet e Bashkuara u vunë muajin e kaluar disa zyrtarëve publik bullgarë dhe disa afaristëve për korrupsion.

Tani sondazhe të tjera sugjeronin një garë të ngushtë midis partisë së zotit Borissov që doli e para me 26 për qind në zgjedhjet e prillit dhe rivalit të saj kryesor - partia anti-elitë “Ka Njerëz të Tillë” e udhëhequr nga një drejtues i njohur televiziv, Slavi Trifonov.

Partia Socialiste e opozitës është radhitur në vendin e tretë, e ndjekur nga grupi liberal anti-korrupsion, Bullgaria Demokratike dhe partia etnike turke, MRF.

Aleanca e re e qendrës së majtë Stand Up! Mafia Out !, e cila u shfaq pas protestave anti-qeveritare të vitit të kaluar, parashikohet të kalojë pragun prej 4% për të hyrë në parlament.

Sipas analistit politik, Dimitar Ganev, ka pak shanse që Borissov të kthehet në detyrë për një mandat të katërt, pavarësisht nëse partia e tij GERB del e para në zgjedhje, meqë shumica e grupeve politike kanë hedhur poshtë idenë e bashkëpunimit me ish-partinë në pushtet.