Tensionet në Veri, Kurti: Serbia po provokon konflikt serioz ndërkombëtar. Reagon Vulin: Budallai që nxit luftë ndodhet në Prishtinë

Kryeministri Albin Kurti ka reaguar pas djegies së Qendrës së Regjistrimit të Automjeteve në Zubin Potok, të cilën e ka quajtur djegie të qëllimshme. Kurti ka shkruar se Serbia po i nxit dhe mbështet aktet kriminale.

Kurti ka shkruar se Serbia po përdorë qytetarë të Kosovës për të provokuar konflikt serioz ndërkombëtar.

Kryeministri i Kosovës, Albin Kurti, ka thënë se personat që kanë sulmuar zyrat në komunat me shumicë serbe janë të nxitur nga Serbia. Madje sipas tij, ky është provokim për “konflikt serioz ndërkombëtar”

“Hetimet preliminare tregojnë që djegia e ndërtesës së Qendrës së Regjistrimit të Automjeteve në Zubin Potok nuk ishte aksidentale por e qëllimshme. Edhe në Zveçan kanë hedhur dy bomba dore, po ashtu në ndërtesën e qendrës së njëjtë për regjistrimin e automjeteve, por ato fatmirësisht nuk kanë eksploduar. Individë ose grupe të cilave sundimi i ligjit dhe rendi e siguria publike ua rrezikon aktivitetin kriminal po e sulmojnë shtetin tonë dhe po e cenojnë paqen. Qartazi ata po i nxit e mbështet Serbia, përkatësisht regjimi autokrat atje. Fatkeqësisht, para syve të bashkësisë ndërkombëtare, Serbia po përdorë qytetarë të Kosovës për të provokuar konflikt serioz ndërkombëtar”, ka thënë Kurti në një reagim në Facebook.

Kurti ka thënë se sulmet e tilla s’do të tolerohen.

“Policia e Kosovës është institucion profesional që duhet respektuar nga të gjithë. U bëj thirrje qytetarëve, sidomos në veri të Ibrit, pavarësisht a janë serbë, shqiptarë, boshnjakë apo romë, që ta ruajnë qetësinë dhe të bashkëpunojnë me institucionet e Kosovës”, ka përfunduar ai.

Ministri i Brendshëm në Serbi, Aleksandar Vulin, deklaroi sot se Ministria e Punëve të Brendshme, njësitë e saj dhe Ushtria Serbe janë të gatshme t’i përgjigjen çdo përshkallëzimi të situatës në veri të Kosovës.

Por, ai shtoi se do të bëjnë gjithçka për të parandaluar çdo konflikt.

“Serbia ka të drejtë të përdorë helikopterë për të kontrolluar çdo pjesë të territorit të saj deri në vijën administrative, dhe këto janë aktivitetet tona të rregullta. Sigurisht, tani interesi ynë është forcuar më tej për atë zonë dhe ne jemi të shqetësuar se njerëzit e armatosur qëndrojnë përballë civilëve të paarmatosur”, ka deklaruar Vulin pas tensioneve të krijuara në veri të Kosovës.

“Nevojiten të paktën dy persona për ta bërë paqen, ndërkaq për luftën dhe konfliktin mjafton vetëm një budalla dhe ai ndodhet në anën tjetër në Prishtinë”, ka thënë Vulin shkruan RTV.rs.

“Serbia nuk negocion kur i vë një armë në ballë. Serbia, e udhëhequr nga Aleksandar Vuçiç, ka dinjitet dhe qëndrim, e di se çfarë dëshiron dhe e di shumë mirë atë që nuk e dëshiron. Ata menduan se Presidenti Vuçiç do të pajtohej me një kompromis ditën e parë vetëm për të qetësuar situatën, dhe tani ata nuk dinë se çfarë të bëjnë”, tha ministri Vulin.

/argumentum.al