Presidenti francez Emmanuel Macron bëri thirrje për një “rend të ri ndërkombëtar” gjatë fjalimit të tij në Takimin Ndërkombëtar Sant’Egidio për Paqen në Paris dje dhe foli për “rimendimin” e marrëdhënieve me Rusinë në mes të luftës në Ukrainë.
Presidenti i Francës, Emmanuel Macron tha se rendi botëror është “i mangët dhe i padrejtë” dhe bëri thirrje se duhet të ndërtohet një rend i ri, raportojnë mediat e huaja.
Ai vuri në dukje se pas luftës Rusi-Ukrainë “duhet të rishikohen marrëdhëniet e Francës me Rusinë dhe të mendohet për një organizim të ri evropian”.
Ai shtoi: “Ne duhet të mendojmë për botën në një formë të re. Është e nevojshme të merret parasysh realiteti gjeografik i Evropës, i cili nuk kufizohet as në BE dhe as në NATO. Duhet të mendojmë për një forma e re e organizimit të Evropës dhe rimendimi i marrëdhënieve me Rusinë në të ardhmen, si dhe paqes në këtë kontinent.”
Në këtë kontekst, Macron pretendon se duke patur parasysh strukturën e saj gjeografike, duhet të merret parasysh “fakti se Evropa nuk është as plotësisht BE dhe as në mënyrë të vendosur NATO”. Presidenti francez kritikoi sistemin ndërkombëtar.
Macron bëri thirrje për ndërtimin e një rendi të ri botëror, duke tërhequr vëmendjen se sistemi ndërkombëtar është “i mangët dhe i padrejtë” me arsyetimin se shumë vende me popullsi të madhe nuk kanë të drejtën e përfaqësimit të mjaftueshëm.
Ai theksoi se ekziston nevoja për “një rend në të cilin ky apo ai (vend) nuk mund të bllokojë të tjerët, në të cilin vendet të përfaqësohen siç duhet dhe ta bëjnë këtë me institucione që janë shumë më të drejta, qofshin ato Kombet e Bashkuara, Banka Botërore dhe Fondi Monetar Ndërkombëtar”.
/Argumentum.al
