“SHBA-të dhe Kina mund të hyjnë në një luftë tregtare, por kjo nuk është lufta jonë. Rusia është e interesuar të zhvillojë marrëdhënie të pavarura me Pekinin dhe Washingtonin”, tha Peskov
Zëdhënësi i Kremlinit, Dmitriy Peskov, ka deklaruar se lufta tregtare midis SHBA-ve dhe Kinës do të ndikojë negativisht në ekonominë globale, transmeton Anadolu Agency (AA).
Duke folur rreth zhvillimeve pas mos arritjes së rezultateve nga negociatat tregtare mes SHBA-ve dhe Kinës, Peskov para gazetarëve në Moskë tha se lufta tregtare mes SHBA-ve dhe Kinës do të ndikojë negativisht në ekonominë globale.
“Ky ndikim mund të jetë vetëm negativ. Por, nuk duhet të ekzagjerohen efektet e mundshme të kësaj lufte ndaj ekonomisë ruse. Ekonomia jonë nuk po rritet aq shpejt sa ne duam, por po përparon me një ritëm të qëndrueshëm”, tha Peskov.
Sipas tij, “SHBA-të dhe Kina mund të hyjnë në një luftë tregtare, por kjo nuk është lufta jonë. Rusia është e interesuar të zhvillojë marrëdhënie të pavarura me Pekinin dhe Washingtonin”.
Peskov gjithashtu kritikoi politikën amerikane të “presionit maksimal” kundër Iranit. “Kjo politikë për të zënë ngushtë Iranin në një qoshe nuk do të japë kurrë rezultate. Përkundrazi, negociatat dhe proceset e zgjidhjes arrijnë në pikën e ndalimit”, tha ai.
