Kancelari gjerman Olaf Scholz tha se bisedimet me zyrtarët kinezë për luftën në Ukrainë gjatë udhëtimit të tij të fundit dhanë një “nxitje shumë të rëndësishme” për përpjekjet diplomatike për t’i dhënë fund konfliktit.
Scholz theksoi se ishte në marrëveshje me udhëheqjen kineze për nevojën e konferencave të paqes në Zvicër për të diskutuar luftën.
Përpjekjet diplomatike janë “diçka që është e domosdoshme në këtë proces të mundimshëm dhe unë jam mirënjohës që Gjermania dhe unë personalisht, gjithashtu ishim në gjendje të jepnim një kontribut,” tha Scholz të premten.
Scholz tha se përpjekjet diplomatike ishin “ende një bimë që ka nevojë për shumë ujitje … por është diçka që ekziston dhe që ne po e ushqejmë.”
Zvicra po planifikon një samit paqeje për 15 dhe 16 qershor, në të cilin synon të ftojë rreth 100 vende, përfshirë Ukrainën.
Rusia nuk pritet të marrë pjesë, por vendet që kanë lidhje miqësore me Rusinë, si Kina, Brazili dhe Afrika e Jugut, mund të bashkohen.
Gjatë vizitës së tij në Pekin të martën, Scholz ra dakord me presidentin kinez Xi Jinping për të koordinuar “intensivisht dhe pozitivisht” në samitin e ardhshëm të paqes dhe konferencat e mundshme të mëtejshme./dpa-argumentum.al
