Në konferencën ndërqeveritare Bashkimi Europian-Serbi, kjo e fundit çel kapitullin e ri në negociatat për anëtarësim në bllokun europian.
Ministrja për Integrime Evropiane e Serbisë, Jadranka Joksimoviç, do të jetë në krye te delegacionit serb në konferencën e Brukselit, ku do të hapet kapitulli i nëntë i negociatave në lidhje me shërbimet financiare.
Pas takimit, Joksimovic dhe Komisioneri i zgjerimit Johannes Hahn, do të nënshkruajnë marrëveshjen financiare, IPA, për vitin 2018, e cila për Serbinë parashikon një fond prej 179.1 milionë eurosh.
Beogradi deri me tani ka hapur 16 kapituj në negociatat me BE-në, nga 35 që janë në total.
Kujtojmë se nga vendet e Ballkanit Perëndimor negociatat për anëtarësim i kanë nisur, Mali i Zi dhe Serbia.
Maqedonia e Veriut dhe Shqipëria mbeten në pritje të vendimit për nisjen e këtyre negociatave, ndërsa Kosova dhe Bosnja-Hercegovina kanë vetëm marrëveshje stabilizim-asociimi me BE-në, që është hapi i parë drejt anëtarësimit në këtë bllok.
