Dhjetëra studentë serbë u nisen sot nga Novi Sadi me biçikleta, mes shiut dhe brohoritjeve, për një udhëtim dyjavor në Strasburg, Francë, ku shpresojnë të rrisin ndërgjegjësimin në Evropë për luftën e tyre kundër korrupsionit, pas disa muajsh protestash në Serbi.
“Ne jemi këtu për t’i treguar botës luftën tonë, për të treguar se ne kërkojmë vetëm drejtësi dhe një shoqëri të drejtë”, shpjegon Lav Stojanoviç, 20 vjeç, një student në Novi Sad, pak para se të largohej.
Të veshur me helmeta dhe xhaketa fluoreshente, dhe nganjëherë të mbështjellë me flamuj serbë, pjesëmarrësit në karvanin me më shumë se 80 biçikleta u nisën në mëngjes nga kampusi i Universitetit të Novi Sadit.
Të strehuar nën çadra shumëngjyrëshe, qindra njerëz shkuan për të përshëndetur largimin e studentëve.
E shkaktuar nga shembja fatale e mbulesës së betonit të stacionit hekurudhor të rinovuar rishtazi të Novi Sadit, lëvizja është zgjeruar duke përfshirë kritikat ndaj sistemit dhe korrupsionit që ka përfshirë vendin, sipas qindra mijëra protestuesve që kanë marshuar prej muajsh.
“Po shkojmë në Strasburg për të marrë më në fund disa përgjigje”, shpjegon Aleksa Mikiç, 21 vjeç, i cili po përgatitet të kalojë 1 455 kilometra me biçikletë, “pasi në vendin tonë, për fat të keq, nuk marrim asnjë”.
Një hetim është hapur për fatkeqësinë e Novi Sadit, por protestuesit kanë kërkuar që në fillim publikimin e të gjitha kontratave të rinovimit me kompanitë kineze, hungareze dhe franceze.
/Argumentum.al
