Vatikani tha të hënën se ishte gati të “lehtësojë dialogun” midis Rusisë dhe Ukrainës për t’i dhënë fund luftës dhe bëri thirrje për ndalimin e menjëhershëm të “sulmit ushtarak”.
Sekretari i Shtetit, Kardinali Pietro Parolin, i cili renditet i dyti pas Papës në hierarkinë e Vatikanit, u tha gazetave italiane se “megjithë luftën e nisur nga Rusia kundër Ukrainës” ai ishte “i bindur se ka gjithmonë hapësirë për negociata”.
Ambasadori i Ukrainës në Vatikan, Andriy Yurash, i tha Reuters në një intervistë më 14 shkurt se Kievi ishte i hapur për një ndërmjetësim të Vatikanit për konfliktin e tij me Rusinë, duke e quajtur Vatikanin një “vend me shumë ndikim, shumë shpirtëror për një takim”.
Parolin, kryediplomati i Vatikanit, u tha gazetave italiane se dialogu ishte e vetmja mënyrë “e arsyeshme dhe konstruktive” për të zgjidhur mosmarrëveshjet.
Selia e Shenjtë, e cila në këto vite ka ndjekur vazhdimisht ngjarjet në Ukrainë, në mënyrë diskrete dhe me vëmendje të madhe, duke ofruar lehtësimin e dialogut me Rusinë, është gjithmonë e gatshme të ndihmojë të dyja palët të rifillojnë një rrugë të tillë, tha ai, sipas një transkripti në faqen zyrtare të Vatican News.
“Mbi të gjitha, sulmi ushtarak duhet të ndalet menjëherë. Të gjithë jemi dëshmitarë të pasojave të saj tragjike”, tha ai.
Ai sugjeroi se kjo është ajo që Papa Françesku i tha ambasadorit rus kur bëri një vizitë të papritur në ambasadën ruse në Vatikan të premten, në një largim të paprecedentë nga protokolli diplomatik.
Parolin tha se bota ishte dëshmitare e ngjarjeve të ngjashme me ato që i paraprinë fillimit të Luftës së Dytë Botërore, një referencë e dukshme ndaj pushtimit gjerman të Polonisë në 1939.
Papa Françesku bëri të dielën një thirrje të pasionuar për korridoret humanitare për të ndihmuar refugjatët të largohen nga Ukraina dhe tha
ata që bëjnë luftë nuk duhet të mashtrohen duke menduar se Zoti është në anën e tyre.
