Gruaja më e votuar në zgjedhjet e fundit parlamentare Vjosa Osmani nga Lista Guxo, pjesë e Lëvizjes Vetëvendosje në Kuvend, është zgjedhur shefe e re e shtetit të Kosovës.
Vjosa Osmani është zgjedhur si Presidente e Kosovës në raundin e tretë të votimit duke siguruar 71 vota nga 61 që ishin të nevojshme. Znj. Osmani do të jetë presidenti i gjashtë i Kosovës.
Nga numërimi i votave në raundin e tretë 11 vota rezultuan të pavlefshme, ndërsa 71 ishin për znj. Osmani, duke dështuar se përveç deputetëve të LVV ka marrë vota dhe nga LDK.
Në raundin e parë kur duheshin 80 vota, znj. Osmani siguroi vetëm 69 vota pasi 12 ishin të pavlefshme.
Ndërsa në raundin e dytë, Vjosa Osmani mori 67 vota, 11 ishin të pavlefshme kurse 4 vota shkuan për kandidatin tjetër, Nasuf Bejtaj.
Në zgjedhjet e fundit parlamentare të Kosovës, pas përjashtimit nga LDK, Vjosa Osmani garoi bashkë me Lëvizjen Vetëvendosjes duke siguruar fitore bindëse.
Vjosa Osmani, 38 vjeçe, është e diplomuar për drejtësi. Ajo më parë ka mbajtur postin e Kryetares së Kuvendit të Kosovës.
E lindur në Mitrovicë, znj. Osmani ka përfunduar studimet master dhe doktoraturë në Universitetin e Pitsburgut, në SHBA.
Karriera e saj politike ka nisur si aktiviste e LDK-së ndërsa në vitin 2009 ajo u zgjodh shefe e stafit të Presidentit të atëhershme të Republikës së Kosovës, Fatmir Sejdiu.
Ajo ka dhënë kontribut për pavarësimin e Kosovës në Gjykatën Ndërkombëtare të Drejtësisë (GJND), ku në atë kohë ishte pjesë e palës kosovare në mbrojtjen e ligjshmërisë së pavarësisë së Kosovës, rast të cilin Kosova e kishte fituar kundrejt Serbisë.
Vjosa Vjosa është martuar dhe është nënë e dy vajzave binjake. Prej tre legjislaturash ajo është deputete e Kuvendit të Kosovës.
