Kryeministri Edi Rama, ka publikuar në rrjetin social X, një artikull të prestigjiozes CNN Travel, e cila i ka kushtuar vëmendje Shqipërisë turistike dhe gjithë atraksioneve që mund të shihen nga turistët. Bunkerët, mbeten një dëshmi e së kaluarës së Shqipërisë dhe periudhës së komunizmit, ndërkohë që sot ato janë kthyer në një atraksion që ka marrë vëmendjen absolute të turistëve që vizitojnë vendin tonë në çdo periudhë të vitit.
“Zhytuni në të kaluarën e errët të Shqipërisë, të shndërruar në një të tashme mjaft gjallëruese! Bunkerët dikur të zymtë tani nxisin rritjen tonë të pandalshme të turizmit. Është e mrekullueshme të shohësh CNN duke shfaqur këtë udhëtim tonin”, shkruan Rama në rrjetin social X.
Në artikull evidentohet se, sot Shqipëria po përjeton një Rilindje Turistike, e mbështetur nga sipërmarrës dhe emigrantë të kthyer që po i japin një jetë të dytë strukturave ushtarake komuniste që dikur përdoreshin për të vendosur armët e luftës.
Për të risjellë historinë dhe traditat e tyre, Shqiptarët tani po ripërdorin bunkerët dhe ish-kazermat ushtarake si restorante që shërbejnë ushqim dhe verë tradicionale – ambiente interesante unike për bujtina, muzetë e artit dhe historisë, madje edhe studiot e tatuazheve.
Ndërsa Shqipëria është ende duke u shëruar nga pasojat e epokës komuniste – ajo mbetet e vendosur për të rimarre kontrollin e narrativës dhe të mos lejojë që e kaluara e errët e vendit ta përcaktojë.
